Nasaan ka na, manggagawa?

NASAAN KA NA, MANGGAGAWA?
ni Gregorio V. Bituin Jr.
11 pantig bawat taludtod

dapat ang uring manggagawa ngayon
ang ating gabay sa wastong direksyon
pagkat sila ang may tangan ng misyon
tungo sa tagumpay ng rebolusyon

ngunit nasaan ka na, manggagawa
maaasahan ka pa ba ng dukha
upang mapawi ang pagkadalita
ng mga inaping masa sa bansa

at sa buong daigdig pagkat ikaw
ang may tangan ng hudyat ng batingaw
upang simulan sa madaling araw
ang pagkawasak ng mga halimaw

na patuloy ang pagyurak sa ating
dangal, pagkatao, asal at galing
dapat lipunan ay palitan natin
lipunang walang aapi-apihin

manggagawa, aasa pa ba kami
na sa mga dukha'y aming kakampi
ilang lider-obrerong magsasabi
kauri, di tayo magpapaapi

paano na kaya kung wala ka na
ikaw pa ba'y meron pang ibubuga
gumising ka't lakas mo'y ipakita
na ikaw pa ang pag-asa ng masa

talagang marami pang dapat gawin
nang sistemang bulok ay baligtarin
tinig ng manggagawa'y dapat dinggin
ng kapwa obrerong kapatid natin

dapat magkaisa na ang obrero
tungo sa kaisipang sosyalismo
mag-organisa't ibagsak ng todo
itong daigdigang kapitalismo